أخبار مراكشسياسةمراكش
أخر الأخبار
المنصوري لقب بنت الصالحين من الهوية المراكشية لقب “معكرط”
المنصوري لقب بنت الصالحين من الهوية المراكشية لقب "معكرط"
محمد طماوي
ها الانتخابات البرلمانية قربات وكلشي كايهضر على المنصوري المنسقة الوطنية لحزب الأصالة والمعاصرة (PAM)، وعمدة مراكش، ووزيرة إعداد التراب الوطني والتعمير والإسكان وسياسة المدينة وبنت الصالحين ( اللهم لاحسد..).
فعلا المنصوري رقم صعب في عالم السياسة وسميتها صبحات تتعاود فصالونات السياسة فالرباط فالمواقع الإخبارية فالسوشل ميديا وفين مامشيتي ما تسمع غير المنصوري رئيسة حكومة المونديال القادمة.
غير هو المنصوري لي تيسميوها المرأة الحديدية فصالونات السياسة كوزيرة وعمدة عندها مسؤوليات وملفات كبيرة تدبرها راه عندها واحد اللقب مرتبط نابع من الثقافة والهوية المراكشية، وهو لقب رزين ورنان تيسميوها به ناس المعنى ديال مراكش بواحد اللقب “معكرط” وهو «بنت الصالحين».
هاذ اللقب ماجاش غير هاكاك وليس مجاملة فهو جا من جذور عائلية وروحانية من تاريخ المدينة الحمراء حيت هي تزادت وتربات فالمدينة العتيقة ووالدي المنصوري مدفونين بزاوية سيدي الإمام سيدي محمد الجزولي – واحد من سبعة رجال وأبرز علماء الصوفية – “شاي الله أسبعة رجال” (البرزاغة ديوها فراسكوم)
من هنا جات البصمة ديال عائلة المنصوري عائلة من الأعيان ديال الحومة القديمة خلاوها جدودها ووالدها عبد الرحمان المنصوري، باشا مراكش السابق، عائلة تايحترمها الكبير والصغير.
وهدشي لي عطا لفاطمة الزهرا لقب بنت الصالحين. ( هذا توضيح لهذاك لي داوي خاوي)
خاص نعرفو أن “ولد الصالحين” ولا “بنت الصالحين” عند المراكشيين ماشي غير هدرة زايدة ولا لحيس كابة، بل هو “تمغريبيت” الحقيقية. والإجتماعية تيعطيوها لشي حد لتربى فعائلة محافظة وحومة الصالحين سيدي بن سليمان راه معروفة من قديم وناس الحومة معروفين بكرمهم الحاتمي وأخلاقهم ولي شك اجرب.
المنصوري بنت مراكش حافظة درب بدرب، هادشي لي خلاها قريبة من المواطن المراكشي والهموم ديالو وهي بغات تزيد بمراكش للقدام و راه قالتها بوضوح : “مراكش أمانة فعنقي”.
ارتباط المنصوري العاطفي والروحي مع ساكنة المدينة العتيقة هو السر الحقيقي وراء استمراريتها وجاذبيتها السياسية في أفق استحقاقات 2026.
